之前恒生指數跌到二萬點，有人出來話二萬點已經是股市低位。
今日股市跌到差不多萬八點，睇厘都冇乜人再估個低位啦！真係低處未算低！唔知到繼北岩，貝爾斯登，兩房，雷曼，高盛，下一間除了AIG以外，還會有幾多間同邊一間呢？同埋唔知幾時又再燒番去歐洲這邊呢？…火燒連環船，真係唔知幾時停。
若果係長線投資者，有錢又唔等錢洗，我諗宜家都可以入D貨坐陣艇，等第二時再收成。不過小弟就無乜閒錢，同埋出泥做野以來，每年都儲錢買一手匯豐，等第二時養老。儲下儲下，加埋以前買落的股票（5、941、857、2628、330）都唔想賣。宜家手頭上現金流未算充裕，心諗都係再等佢再低D時，先諗買番D貨。若果買，目前目標暫時就會放係匯豐（長線、高息）、國泰（周期）、中壽（增長）、平保（增長）、SOHO同瑞房（博反彈）。宜家都係靜觀其變，或者將資本投放得分散一點，宜家只楂住美元資產好似不合世情。睇下可否在HK$6.1再買些澳幣來收息，我估美元都應該會係11月大選後轉弱。估這樣好似點都易過估股市低位，同楂外幣靈活D，息口收入有數計。另外再諗下將手頭上部份人民幣轉番做港紙以加大現金流（因為息低同有貶價風險）。
